Onte foi a festa do Corpus en Vilanova. Coma todos os anos celebrárona moito.
Inda ben non era día estalaron os primeiros foguetes. Hogano como son mordomos os do Toxal e teñen algo de xenreira cos da Hermida, os mordomos do ano pasado, con aquel de non ser menos, queimaron pólvora a esgaia.
Cos estoupidos espertaron os nenos da aldea e vestíronse ás carreiras por ver quen chegaba antes a apañar as canas dos foguetes. Lelo xuntou cinco.
Despois do almorzo, tanto Lelo coma Pedriño, Rosiña e os demais rapaces da súa edade, tiñan cita na igrexa co señor cura. Habíalle que dar un repasiño antes da misa á doutrina, pois hoxe, por se non volo dixen, estaban de primeira comuñón.
-A ver, Pedriño, dime o Noso Pai.
- "Noso Pai que estás no Ceo: santificado sexa o teu nome, veña para nós o teu Reino e fágase a túa vontade aquí na terra coma no Ceo. O noso pan de cada día dánolo hoxe, e perdóanos as nosas ofensas coma tamén perdonamos nós a quen nos ten ofendido: e non nos deixes caír na tentación, mais deféndenos do mal. Amén."
-Fai o sinal da Santa Cruz, Lelo.
-"No nome do Pai, e do Fillo e do Espírito Santo".
-A ver, Rosiña, a Avemaría.
- "Ave María, chea de gracia, o Señor está contigo. Ti es a máis bendita de tódalas mulleres, pois bendito é o froito das túas entrañas, Xesús. Santa María, Nai de Deus, prega por nós, pecadores, agora e na hora da nosa morte. Amén "
Despois das dez e media confesaron. Confesaron co cura de Rebordela, pois ao de Vilanova déballes vergoña dicirlle os pecados. Segundo ían rematando, saían como lóstregos para as súas casas a poñer os traxiños novos.
Ás doce e media empezou a chegar a xente ao adro da igrexa, xa que é unha era a misa. Os homes quedábanse fóra a contos, e as mulleres entraban a rezar unha estación, a pasar polo confesionario ou a mirar que ben adornara todo a muller do sancristán.
Ao mesmo tocar a campá a derradeira vez, entraron os homes. Uns quedaron abaixo, atrás, e outros subiron á tribuna.
A misa tivo momentos moi emocionantes, sobre todo cando os nenos comungaron e cando o señor cura lles predicou aos feligreses. Houbo mulleres a quen se lles arrasaron os ollos de auga.
Para remate houbo procesión arredor da igrexa. O tío Colás do Toxal (o mordomo) e os fillos levaban o palio. Entre os outros rapaces da parroquia, en grupos de a catro, a San Antonio, á Virxe das Neves e a San Isidro. Mentres estalaban os foguetes dicía para si o tío Colás:
-"Desta ha de aprender Pepe da Hermida como se fai unha festa".
Á saída da misa poxaron dúas linguas de porco, un lacón, dous galos e polo menos unha ducia de galiñas a repartir entre as ánimas e san Antonio. Os nenos, mentres, repartían recordatorios da primeira comunión. Vede o que di o do Lelo:
"Lelo Souto Seoane, recibiu por primeira vez o Pan dos Anxos, de man do reverendo don Raúl Méndez Figueras. Vilanova, 13 de xuño".
Juan A. Thomas, Ph.D.
Juan A. Thomas, Ph.D.
Associate Professor of Spanish, Chairman of the Foreign Language Department
1600 Burrstone Rd
Utica, NY 13502
Utica, NY 13502
jathomas@utica.edu
(315) 792-3028