14 Blanco Amor

14 Eduardo Blanco Amor

Eduardo Blanco Amor (Ourense, 1897 - Vigo, 1979) Premio Día das letras galegas 1993, xornalista, ensaísta, novelista, dramaturgo, empeza a súa carreira artística na Arxentina e publica obras de poesía Romances galegos (1928) e Poema en catro tempos (1931).  Máis tarde publica as súas novelas máis importantes que aínda hoxe en día son recoñecidos coma obras mestras da literatura galega-  estas son A esmorga (1959), Os biosbardos (1962) e Xente ao lonxe (1972). O seguinte texto vén de A Esmorga   ed. Galaxia, Vigo  1970, p. 45.

Así o fixemos... Aló na galería, que tiña unha das ventás erguidas, víase a máis belida muller que nin pintada eu tiña visto.  Lucía mesmamente coma a Virxe do ceo, sen ofender a ninguén.  Era branca, branca, co cabelo negro... Tiña os brazos nus, cheos de alfaias, botados para fórada fie stra, como se quixese que se mollasen coa auga da chuvia e tiña posto un vestido, branco tamén e   levián para o tempo que facía, como se non lle importara ren do frío.  e   polo medio da cabeza víñalle un manteliño ou un veo de cor azul, e   os cabos del saían pola fiestra e  arrandeábanse co vento, e  como a dona estaba tan queda, semellaban ser a única cousa que tiña vida de seu.  Sorría, fitando para onde nós estabamos, pero sen pestanexar, cos ollos mouros,  grandes e  moi abertos, que aínda poñían seu aquel medo...

Nesto, ao  traveso dos cristais embazados, viuse vir pola galería un vulto de home, e  acurruchámonos de novo sen deixar de fitar.  Dapouco, chegóuse á fiestra e  púxose á par da señora un cabaleiro alto, moi fraco, de barba vermella e  comprida, fardado cun capildó coma de crego ou de frade.