16 Franco Grande

16   Texto literario  Entre o si  e o non por Franco Grande


Aran os bois a codia desta terra
e cando a tona fenden
a terra amostra  ao  sol
o suco onde o arado atopa a laxe...
Un xuramento, un suco e  outro máis,
outro e  mais outro, e  logo
pan de centeo e  grolos
de viño das cepeiras ben retortas.
Fumega aínda a terra aberta en sucos;
o suco canta alá por Salgueiró
e un arrecendo a froumas
polo éter chega ás leiras estercadas.
Entre os centeos canta o paspallás
e  algunha cousa madurece no éter;
o cuco canta e  canta
e  a terra esperta dun pesado sono...
e agora, ao  lusco fusco,
a terra arada colle unha cor violeta;
os bois bafexan, cansos,
e a terra toda agarda algunha cousa.
Cada xugada volve á corte a modo
e leva enriba o peso dos seus cornos;
o gran agarda abrirse no seu tobo
e móvese no seo desta terra...!

Franco Grande, Entre o sí e o non   ed. Galaxia, Vigo  1967  p. 97