A familia

CAPÍTULO I: A familia
Lectura: A familia
                              

Lectura   A familia A familia de Souto vive en Vilanova de Ribarteme.  Don Antón, o médico do concello, un home  aínda novo que viviu sempre na aldea, de non ser os anos  que pasou estudiando en Santiago.  Alí casou coa que hoxe  é a súa muller, Rosario Seoane.  Cando volveron xuntos para  Vilanova, tiñan xa un fillo, o Henrique, que está para entrar  en quintas.  Carme, súa irmá, é dous anos máis nova ca el.   Pero o rei da casa é o pequeno, Lelo, que cos seus cinco  anos fai o que quere.  Con ser tan cativo, manda nos pais,  nos avós, e mesmo nos tíos e curmáns que ás veces veñen  visitar o petrucio á casa dos antergos.

O avó, o tío Pepe, como lle chaman na aldea, xa vai vello,  pero aínda está rufo.  Hai poucos días que fixo os seus  setenta e cinco anos.  Foi un día de ledicia para o tío Pepe,  porque viu xunta toda a súa parentela: fillos, sobriños, netos,  bisnetos, xenros, noras, compadres.  Todos estiveron na  casa.  Despois do xantar, countoulles contos de cando el era  novo, de seu padriño que emigrara a Buenos Aires, das  mozas que tivera, do seu casamento, do nacemento e bautizo  do primeiro fillo, de cando morrera a súa muller..

Cando enviudou o tío Pepe, quedou sen máis ilusión cá de  ver como medraban os netos, pero sempre di  que non quere  que o enterren sen poder apadriñar algún tataraneto.